A princesa do Caurel, nova exposición na Biblioteca Fundación Caixa Galicia

A Biblioteca Fundación Caixa Galicia en Santiago de Compostela acolle durante o mes de xuño a exposición de orixinais das ilustracións do libro A Princesa do Caurel, de Marisa Núñez que contén as ilustracións de Javier Solchaga. A mostra inaugúrase coincidindo coa visita dos alumnos de 4º de primaria do colexio Peleteiro de Santiago.

Ademais, durante todo o mes de xuño, os máis cativos tamén poden gozar na Biblioteca do ciclo A biblioteca de Tintín, unha serie de proxeccións diarias de filmes de Tintín.

Este libro ven de ser seleccionado pola Biblioteca Internacional da Mocidade de Múnic para os premios White Ravens que elixen os libros infantís e xuvenís considerados de máis interese do mundo por tratar temas de alcance universal e pola súa calidade literaria, artística e de deseño.

A exposición A princesa do Caurel conta con ilustración tridimensional elaborada a partir de elementos reciclados (botellas, madeira, pedras, arame...). O ilustrador presenta obxectos e personaxes (anel, pano, pau...) desde un ángulo imposible, para que o lector tente adiviñar o suxeito protagonista da seguinte acción.

Nesta mostra, que pode visitarse ata o 30 de xuño, texto e imaxe compleméntanse nun conto que revela outros puntos de vista e esperta a imaxinación dos máis pequenos.