A Feira do Libro de Santiago acolle a presentación de Os hemisferios

Carlos Lema, director de edicións de Editorial Galaxia, e Manuel Outeriño, profesor da Facultade de Ciencias da Comunicación, acompañan á autora, María do Cebreiro, na presentación do seu último poemario: Os hemisferios.

Velaquí un libro concibido como un diálogo a través do cal María do Cebreiro nos propón un xeito diferente de abordar a poesía. Os hemisferios publícase na colección Dombate, que continúa a incorporar as poetas e os poetas das últimas xeracións ao catálogo de Editorial Galaxia.

Achegarse á poesía a través da conversa é, para María do Cebreiro, unha maneira de deixar a porta aberta e permitir que a lectora ou o lector entre directamente, sen convite, no poema. Os
hemisferios parte da idea de que o texto, e con el o libro, se debe relacionar directamente co que hai fora del. As árbores e os planetas, a terra e o ceo forman ese acubillo no que se gorecen as voces que falan entre elas e lle falan a quen le. Para a poeta, a escritura é coma un troco, un intercambio que a lectura fai real, palpable e sonoro.

Unha das poetas máis sorprendentes da actual literatura galega, María do Cebreiro afirma neste libro que comeza a escribir “cando o leite está a punto de ferver” para, despois, esperar ata o último momento porque “o que máis me impresiona é que rompa en silencio”. Os hemisferios é un libro no que se constata que a comunicación é anónima pero a conversa é persoal; é un libro no que non hai nada que explicar, nada que interpretar, nada que comprender. Unha especie de conexión eléctrica que provoca outro xeito de ler e relaciona directamente o texto coas outras correntes da vida.


María do Cebreiro (Compostela, 1976) é escritora, crítica literaria e investigadora. Obtivo o Premio de Investigación Dámaso Alonso coa obra As antoloxías de poesía en Galicia e Cataluña. Representación poética e ficción lóxica (2004). É autora dos libros de poemas O estadio do espello (1998) e (Nós, as inadaptadas) (2002), accésit do Premio Esquío. Co poemario Non queres que o poema te coñeza (2004) recibiu o Premio Caixanova e, o mesmo ano, publicou O barrio das chinesas e o libro de ensaios As terceiras mulleres. Foi coordinadora das antoloxías A poesía é o gran milagre do mundo (2001) e Damas Negras (2002).