Maxi Rei presentou o seu poemario Vizoño

O 29 de decembro de 2006 tivo lugar no edificio Liceo a presentación de “Vizoño”, libro de poemas do mozo de Abegondo Maxi Rei, licenciado en Historia, quen na actualidade está a residir en Dos Hermanas (Sevilla) por razóns de traballo.

No acto interviron Pilar Vázquez, presidenta de Eira Vella; Xesús Torres, coordenador da revista A Xanela, que edita esta entidade e na que o autor ven colaborando dende o seu inicio; Miro Villar, poeta e estudoso da literatura galega, rematando o acto o propio autor que recitou algúns poemas do libro.

O poemario está editado pola Asociación Cultural Eira Vella e reproduce na portada un gravado do artista betanceiro Jesús Núñez, director do CIEC.

“Vizoño” é un poemario autobiográfico, composto de vintetrés poemas, que quere rescatar a memoria da infancia, sentida como un tempo feliz, ao tempo que nos fala da desaparición e abandono do mundo rural.