A Aula de Teatro da USC porá en escena a súa nova produción Trufaldino, servidor de dous amos

A Aula de Teatro da Universidade de Santiago estrea este martes, día 19, a súa última produción teatral Trufaldino, servidor de dous amos, de Carlo Goldoni, nunha sesión que vai ter lugar no Teatro Principal ás 21:00 horas

Trufaldino, servidor de dous amos é un espectáculo centrado no traballo de actor onde conviven ao tempo o valor literario do texto de Goldoni e a improvisación nun difícil equilibrio, para contar unha historia de enredos na que o importante reside en como contala. A compañía da Aula de Teatro xa foi convidada a presentar este traballo en diversos festivais, entre outros, no prestixioso International University and College Theatre Festival in Valleyfield, en Canadá.

Ao longo destes dous últimos meses os alumnos da Aula de Teatro estiveron traballando sobre o uso do corpo na farsa e a depuración dos códigos da comedia da arte, no que vén ser o último traballo da triloxía dedicada á farsa que centrou o estudo da última promoción de actores.