Lamatumbá actúa en Santiago nun concerto gratuito co que Xuventude pretende homenaxear aos voluntarios en defensa do monte galego

O Concerto Solidario organizado pola dirección xeral de Xuventude para homenaxear aos voluntarios e aos profesionais que traballaron, e aínda traballan, nos montes galegos, asolados pola vaga de lumes do pasado verán, ten lugar o 5 de decembro, ás 21,00 horas, no multiusos do Sar. O concerto, ao que se espera que asistan miles de persoas, inclúe a actuación do grupo galego Lamatumbá e a dos cataláns The Pinker Tones e os ingleses Asian dub Foundation.

Este concerto celébrase coincidindo co Día do Internacional do Voluntariado porque, segundo o director xeral de xuventude, Rubén Cela,” pretende ser unha homenaxe aos máis de 6 mil voluntarios que chamaron ao teléfono en Defensa do Monte para colaborar nas labores de intendencia ou rexeneración de montes así como ás decenas de bombeiros e outros colectivos que prestaron a súa axuda desinteresada”.

Intercaladas coas actuacións, proxectaranse, en grandes pantallas, imaxes dos voluntarios desempeñando distintas tarefas nos montes galegos. Haberá ademais stands con información sobre o teléfono en Defensa do Monte Galego que leva funcionando dende o 9 de agosto.

A entrada ao concerto, organizado pola dirección xeral de Xuventude en colaboración coa concellería de Cultura de Santiago, é totalmente gratuita. Ademais haberá autobuses cada vinte minutos dende a Praza Roxa para trasladar aos asistentes.

O director xeral de Xuventude, Rubén Cela, ten previsto asistir a concerto.