Editorial Galaxia presenta Entre fronteiras

O 12 de abril Editorial Galaxia presenta a nova novela de Xavier Alcalá, Entre fronteiras, o primeiro volume dunha triloxía titulada Evanxélica memoria. O acto terá lugar ás 20.00 horas na Fundación Penzol de Vigo.
A nova novela de Xavier Alcalcá forma parte dun proxecto narrativo centrado na historia nunca contada das comunidades evanxélicas en Galicia. Entre fronteiras narra a historia dunha represión. Partindo de feitos reais, a novela de Alcalá achéganos á verdade a través da ficción. As consecuencias de vivir cunhas conviccións relixiosas diferentes e as vicisitudes que o contexto histórico imppón aos evanxélicos en Galicia constitúen a materia prima da triloxía Evanxélica Memoria iniciada coa novela que agora publica a Editorial Galaxia.
Entre fronteiras supón un esforzo narrativo singular. A historia que conta Xavier Alcalá nesta novela comeza durante o reinado de Alfonso XIII e chega á guerra civil. As circunstancias e os personaxes son retratados coa exactitude dun escribán de xulgado e o pulso firme dunha narración que flúe dun xeito imparable. A base documental da novela está tomada directamente das conversas que o autor mantivo con membros da comunidade evanxélica en Galicia, os seus testemuños axudaron a Alcalá a tecer un relato de ficción relativamente verosímil, amais de apaixonante polo que ten de historia vivida.
Xavier Alcalá descobre unha parte ata o de agora pouco coñecida da nosa historia. O autor anunci a continuación desta epopea do noso tempo outras dúas novelas máis, Nas catacumbas e Unha falsa luz. Cada unha das partes da triloxía pódese ler de xeito independiente, xa que abrangue distintos períodos da historia recente: a guerra civil, a posguerra e o franquismo ata a morte do dictador.
Xavier Alcalá (Miguelturra, Cidade Real, 1947) é enxeñeiro de telecomunicacións aamais de colaborador na prensa, actualmente cunha columna en La Voz de Galicia. Instalado en Galicia desde a nenez, iniciou a súa obra literaria con Voltar, seis personaxes e un fado (1972), obra á que ían seguir títulos como A nosa cinza (1980), Fábula (1980), Nos pagos de Huinca Loo (1982), Cárcere verde (1990), Latitude austral (1991), Código morse (1996), e Alén da desventura, novela coa que obtén o Premio Blanco Amor no ano 1998.