Redondela celebra a V Noite da Lúa Meiga

Unha vez máis, preséntase a meirande festa en honra da tradición e cultura populares: a V Noite de Lúa Meiga; e, como non, recalcando o marco natural incomparable no que ten lugar: O Miradoiro do Outeiro Grande, no Viso (Redondela), onde se contempla a Ría de Vigo no seu esplendor.

Este festival pretende ser un referente na defensa e difusión da música e culturas tradicionais. Deste xeito, agrupacións folclóricas da comarca, grupos noveis e consolidados da música tradicional e folk de Galicia, así como artesáns, únense para dar luz á xa 5ª edición desta xa consolidada Noite da Lúa Meiga. O idioma, canto e música en galego, como medio de expresión da nosa tradición, é o eixe sobre o que se fundamenta este evento, constante nos días en que éste dura.

A V Noite de Lúa Meiga celébrase os días 26 e 27 de agosto de 2006. O sábado 26, a iso das 19h o recinto acolle a mellor das Feiras de Artesanía para os interesados en todo o feito dende aquí, da forma máis artesanal. Posteriormente, a iso das 21.30h, e así é como se anuncia a chegada da lúa coa Ría de Vigo de fondo, grupos de renome na Galiza son os encargados de facernos troulear e gozar coma nunca nun Concerto onde se amosa o noso ser máis festeiro e representativo. Grupos que, sen dúbida algunha, farán pasar unha velada inesquecible a cada un dos asistentes a esta V Noite de Lúa Meiga, gozando da auténtica ¡¡¡¡¡¡¡¡¡¡¡¡¡¡¡FESTA RACHADA!!!!!!!!!!!!!!

O domingo 27 continuaremos dende pola mañá coa Feira de Artesanía; grupos tradicionais serán os encargados de amenizar a velada, e a xente achegarase en romería ó monte Outeiro Grande, onde se realizará un gran xantar popular no medio da natureza. Os asistentes apoderaranse do monte e colaborarán como antaño traendo diversas viandas e instrumentos, cos fentos, piñeiros e carballos coma testemuñas de excepción. Pola tarde darán comezo os Xogos Populares, dirixidos a pequenos e maiores que queiran pasar un rato do máis divertido: tiro da Corda, carreira de Sacos, busca do Tesouro, chave, rastrexo, carreiras,... e máis. Non cabe dúbida que se poderá descargar toda a adrenalina,...

Máis información: http://www.terrameiga.net