A Fundación Carlos Casares promove os III Diálogos Literarios de Mariñán

O, xoves, día 1º de xuño, ás 10 horas, dan comezo os III Diálogos Literarios de Mariñán que anualmente organiza a Fundación Carlos Casares no pazo do mesmo nome, en Bergondo, co patrocinio da Deputación da Coruña, a Fundación Caixa Galicia e a Secretaría Xeral de Política Lingüística.

Na sesión matutina interveñen Xosé María Álvarez Cáccamo e Antón Baamonde, presentados por Carlos Fernández, para falar de Historia, literatura. A continuación realízase o acto de inauguración oficial, 13.30 horas, no salón de actos do pazo, coa presenza do Presidente da Deputación, Salvador Fernández Moreda, o deputado provincial de Cultura, Celestino Poza Domínguez, a directora da Fundación Caixa Galicia, Teresa Porto, a Secretaria Xeral de Política Lingüística da Xunta de Galicia, Marisol López e a presidenta da Fundación Carlos Casares, Kristina Berg.

Rosa Regás e Ramón Loureiro

Pola tarde, ás 20 horas, na nova sede da Fundación Caixa Galicia na Coruña (Cantón Grande, 21-24), Rosa Regás, directora da Biblioteca Nacional e Ramón Loureiro, escritor e xornalista, presentados polo poeta e editor Miguel Anxo Fernán-Vello, disertarán sobre Fala, memoria, na única sesión de carácter público destas xornadas.

Os Diálogos de Mariñán continuarán os días 2 e 3 de xuño coas intervencións de Juan Antonio Hormigón, Marina Mayoral, Ian Gibson, Xosé Carlos Caneiro, Antonio Martínez Sarrión, Francisco Fernández Naval, José Luis Ferris e Fernando Salgado, nun encontro que xa pasa por ser un referente de intercambio intercultural e diálogo entre a literatura galega e as culturas máis próximas.