Celebración da Noite dos Museos no Castro de Viladonga (Lugo)

O sábado 20 de maio celebrouse no Museo do Castro de Viladonga a Noite dos Museos. En torno ás 19:30 iniciouse a actuación do grupo Espazo de Danza da Universidade de Santiago, que executou no propio Castro unha vistosa coreografía do seu director Juan Carlos Zahera, titulada “Soños”, coa música en directo do acordeonista Aleix Martínez.

A continuación, no interior do Museo, o dúo de corda Lira interpretou diversas pezas clásicas e outras adaptadas da música popular galega. O Museo agasallóu despóis ó numeroso público congregado (en torno ás 140 persoas, entre as que se encontraba o Director Xeral de Patrimonio, Felipe Arias Vilas), a unha merenda servida polo restaurante La Palloza nos xardíns do recinto.

Logo Marica Campo leu o poema que Manuel María adicou ó Castro de Viladonga e o Presidente da Asociación de Amigos, Xosé Manuel Carballo dirixiu e acompañou co seu florido verbo a queimada ritual. Cando caeu a noite fíxose unha visita ó Castro sempre suxerente nesas horas de semiescuridade.