O visitante 200.000 chega ao MARCO

Os responsables do MARCO estiveron atentos á chegada do visitante que facía o número 200.000, que cruzou o vestíbulo do museo en torno ás 18.00, e que foi obsequiado con varios dos catálogos recentemente publicados e cunha tarxeta de membro da Agrupación de Amigos do MARCO que, entre outras vantaxes, permite o acceso gratuíto a todas as actividades do museo durante un ano.

O visitante 200.000 foi Ramon Benedito, procedente de Barcelona e responsable de Benedito Design, estudio de deseño industrial fundado en 1973, que foi gañador do Premio Nacional de Deseño no ano 1992. A súa principal área de actividade é o deseño de aparatos electrónicos e informáticos, instrumental técnico e científico, máquinas y ferramentas, iluminación, equipamento doméstico, elementos para instalacións e para a construción, envases, embalaxes e mobiliario. Ramón Benedito, que estes días acudiu a Vigo por motivos laborais despois de varios anos sen visitar Galicia, obsequiou tamén ao director do MARCO, Iñaki Martínez Antelo, cun exemplar do seu catálogo editado con motivo da concesión do Premio Nacional de Deseño.