A Asociación de Actores, Directores e Técnicos de Escena quere amostrar o seu abraio por toda a situación que acabou desembocando na dimisión da directora do C.D.G., Ánxeles Cuña.

A nosa Asociación non pode ser contraria ao exercicio do rigor legal por parte dos entes encargados da xestión cultural, rigor que, polo que se ve, non se aplicou na etapa anterior, pero lamenta que ese exercicio só se manifeste, cando menos polo de agora, como atranco e factor retardatario do desenvolvemento dun proxecto que, a estas alturas da temporada, xa non pode retrasarse máis. Esiximos por tanto que ese mesmo rigor se aplique tamén en todo o que atinxe á eficacia e optimización do labor do I.G.A.E.M., que sexa un rigor dinámico e potenciador e non só un rigor meramente legalista.

Así pois instamos a quen corresponda a que emprenda as reformas estruturais e normativas necesarias para que o I.G.A.E.M. e as súas unidades poidan ser entes áxiles e imaxinativos no seu funcionamento administrativo, para que tamén poidan incorporarse aos seus cargos directivos profesionais válidos e ilusionados que queiran cubrir unha etapa da súa vida á frente das devanditas unidades sen por iso vérense abocadas a perderen a súa seguridade laboral futura, co risco que iso supón de que os tales postos directivos se convertan en táboas de salvación ás que aferrarse indefinida e acriticamente.

Por outra parte requerimos que o posto vacante se cubra de inmediato, e solicitamos do novo director ou directora do C.D.G. que, entendendo as especificidades do seu criterio e respeitando a súa liberdade de acción, trate de aproveitar ao máximo as enerxías postas en marcha no camiño recén iniciado, para evitar así no posíbel os perxuízos que poidan ocasionarse aos profesionais do sector e, sobre todo, á dinámica da actividade teatral no país.