Fernando Pérez-Barreiro Nolla e Iolanda Galanes Santos, gañadores do V Premio de Tradución Plácido Castro

A Fernando Pérez-Barreiro Nolla, pola tradución de Breviario do pensamento clásico chinés, e a Iolanda Galanes Santos pola tradución de A herdanza dos caracteres adquiridos de Michel Delsol.

Igualmente, o xurdado declarou como finalistas a Ramón Iglesias Míguez, pola tradución de A Casa de veraneo de Kneller, de Ha-Kaitanah Shel Kneller, primeira tradución do hebreo ao galego; e a Xoán Garrido Vilariño, pola tradución de Historia de Shoah, de Georges Bensoussan.

O xurado, integrado por: Asociación de Traductores Galegos (Xosé María Gómez Clemente); Fundación Plácido Castro (Xulián Maure); Real Academia Galega (Francisco Fernández Rei); Universidade de Vigo (Auria Fernández Rodríguez); Xunta de Galicia (Carlos Arias Iglesias); e Secretaria: María del Mar Gómez (IGADI), destacou a calidade das obras premiadas.

É a terceira vez que se falla ex aequo este Premio, dotado con 3.000 euros e único no seu tipo en Galicia. Na primeira edición recaeu en Lois Tobío e Valentín Arias; Xesús Riveiro Costa; Enma Lázare; e Xela Arias e Moisés Rodríguez Barcia, foron os gañadores das catro anteriores edicións.

O premio será entregado o 28 de xaneiro en Cambados, vila onde faleceu Plácido Castro.

Igualmente, a Fundación convoca en Santiago a VII Conferencia Anual Plácido Castro que se celebrará o próximo 25 de xaneiro, coincidindo co natalicio do autor, no Club Internacional de Prensa, para abordar o panorama da prensa galega en tempos de Plácido Castro, da man de Luís Álvarez Pousa, profesor da USC e membro do Consello Asesor do IGADI.