A AELG presenta o seu novo portal web

O acto terá lugar mañá sábado, día 10 de setembro, na Libraría
Sisargas (rúa Curros Enríquez, 9) da Coruña a partir das 12:00 hs., e
intervirán nel o Presidente da AELG, Cesáreo Sánchez Iglesias, e Nieves
Brisa Boa en representación da empresa Enxeño S.L., responsábel técnica da
creación do portal.


O Centro de Documentación de Escritores e Escritoras en Lingua Galega nace
co obxectivo de conservar e pór á disposición dos investigadores/as e de
todas as persoas interesadas desde todas as culturas, aqueles materiais
xerados polos escritores e escritoras en lingua galega, así como a súa
actividade social: obra de creación e de investigación, obra crítica e
calquera outro tipo de documentación que poida enriquecer o coñecemento do
feito literario en galego.

A creación deste Centro de Documentación parte da carencia dunha entidade
aglutinadora da documentación sobre as escritoras e os escritores vivos,
mais tamén da necesidade que a figura do escritor/a ten de contar cun
centro que os axude na súa difusión e recepción social. É por iso que o
Centro de Documentación de Escritores e Escritoras da AELG é o lugar en
que se recolle toda a información e documentación depositada polos
escritores/as, e que será procesada para poder dispor dunha ampla fonte
documental á que ter acceso áxil desde a rede.


Ademais da incorporación do Centro de Documentación , o portal web da
AELG foi mellorado co desenvolvemento dun entorno de administración para o
mantemento e xestión dos seus contidos.