Un ciclo de concertos levará a música clásica aos tres campus da UVigo

Trátase dun ciclo de actuacións abertas a toda cidadanía e con entrada gratuíta, que arrancará o vindeiro xoves 3 de outubro, ás 20.30 horas, na Vicerreitoría do campus de Pontevedra. O seguinte concerto terá lugar o mércores 9, ás 20.00 horas, no salón nobre do Liceo de Ourense, mentres que o último recital será o xoves 24 en Vigo, no terceiro andar do edificio Redeiras, tamén ás 20.00 horas.

Como explica Reboreda, trátase dunha iniciativa que se impulsa por primeira vez ao abeiro do asinado entre a UVigo e a Orquestra Clásica de Vigo, “quen desde hai anos organiza e protagoniza o Concerto de Nadal da nosa institución”.

Recuperación de obras inéditas ou esquecidas

A Clásica na UVigo terá como protagonista ao dúo que integran Mariño e Gómez, antigos integrantes do Cuarteto de Corda Faraday, gañador do segundo Premio Internacional de Música de Cámara C. M. Giulini. Ao longo da última década, estes dous músicos formaron parte tamén de varios ensembles e actuaron como solistas, interpretando obras de Bach, Mozart ou Atterberg, con varias orquestras europeas.

Como recolle o texto de presentación deste ciclo, “a súa experiencia como intérpretes de música de cámara está ligada á súa prolongada estancia no estranxeiro, impulsada, nun primeiro momento, polo programa Erasmus” e posteriormente por diferentes premios e bolsas. Mariño Suárez e Gómez Vilar impulsaron o Dúo Fuchs en 2019, co gallo do Festival Internacional Alpen Classica, no que colaboran habitualmente como profesores e intérpretes, iniciando entón a andaina dunha proposta musical que pon o foco en “obras inéditas ou esquecidas”, resultado “dun traballo constante de recuperación e revalorización de obras para dúo de diferentes épocas e estilos, que abranguen dende o século XVIII ata os nosos días”.

Tanto Mariño, profesor no Conservatorio Superior de Música de Vigo, como Gómez combinan a actividade interpretativa coa colaboración con centros e proxectos educativos en diferentes puntos de Europa. Ambos, ademais, suman a súa actividade musical e educativa o labor investigador que desenvolven en programas de doutoramento das universidades de Vigo e Uviéu.

Nestes tres recitais, o Dúo Fuch interpretará un programa conformado por Six sonates a deux violons Op.4 n.2, de Maddalena Laura Lombardini-Sirmen; Douze Duos Op. 49, de Reinhold Glière; Six duets concertanti Op- 15 n. 3, de Federigo Fiorillo, e Spanische Weisen Op. 113, de Charles Auguste de Bériot.