A Sala Alterarte abre unha nova etapa coa coordinación de Javier Blanco e o proxecto Reciprodicidade

Javier Blanco Sierra (Ourense 1955), de nome artístico Xavier Riomao, é profesor da Facultade de Educación e Traballo Social do campus de Ourense. É, ademais de galerista, comisario e crítico da arte, artista visual que ten realizando exposicións individuais e mostras colectivas dende os anos 80 do século pasado, estando a súa obra presente en colecciones individuais e públicas. Reciprocidade, explica Blanco Sierra, “é un proxecto onde se entende que o concepto de arte, como elemento de carácter social, derívase evidentemente de que o seu marco sexa a comunidade: só aquí, no ámbito comunitario enténdese, en toda a súa amplitude, algo chamado arte”.

O citado proxecto expositivo parte da idea de configurar a Sala Alterarte como “un potente lugar de encontro e intercambio de ideas, propostas e reflexións acordes aos intereses da nosa sociedade”. Así, sinala o seu coordinador, en Reciprocidade “emerxe a vontade de xerar un diálogo que propicie a presenza do espazo Alterarte, situado no campus de Ourense, coa cidadanía da cidade”. Alén de desenvolver o eido expositivo da sala, este proxecto tamén afondará “no seu ámbito cultural e didáctico”, apostando por atraer o interese de alumnado de centros da contorna relacionados co eido artístico e tamén da propia Facultade de Educación e Traballo Social, que entre as súas materias está a didáctica da arte. “A cultura é unha experiencia que necesariamente ten que ser transmitida desde os ámbitos educativos e universitarios aos diferentes estamentos que configuran a sociedade de proximidade, en sintonía coas tendencias da chamada arte relacional”, sinala Javier Blanco.

Diversidade de propostas

Para este curso 2023/24 son cinco as mostras previstas. Desde o pasado mes de setembro e ata mediados de novembro pode verse en Alterarte a exposición Clinamen. Catro propostas de abstracción radical, comisariada por Manolo Figueiras e con obras dos artistas ourensáns Alejandro Caporale, Antonio Fernández Seoane, María Puertas e Antonio Soria Rocafort. Seguiralle en novembro e decembro a exposición Resalire (Non nos xulgues, imaxes de rexeitamento aos esterotípos de mozos/as dos sistemas de protección), de Fuco Reyes e comisariada por Carlos Rosón, director de Igaxes. Xa en 2024, a programación da sala arrancará en xaneiro con Tótems, de NEG (Nova escultura galega), comisariada por Jorge Varela. En marzo será a quenda da exposición S/T, de Fernando Barreira e coa comisaria Tareixa Taboada. Por último, o curso rematará con De pictura, con obra de Juan Carlos Meana, falecido profesor e ex decano da Facultade de Belas Artes do campus de Pontevedra, e comisariada por Xosé Manuel Buxán, que foi director de Alterarte e decano de dita facultade da UVigo.