O Festival Internacional de Cinema Play-Doc de Tui celebrará a sua XVIII edición do 4 ao 8 de maio

A 18 edición de Play-Doc, que se celebrará do 4 ao 8 de maio na localidade pontevedresa, acollerá primeiras retrospectivas españolas, europeas e internacionais, non só de cineastas de culto e verdadeiras lendas do cinema documental, senón que tamén contará con estreas destacadas do cinema contemporáneo actual e da produción galega máis recente.

A súa programación completarase cun rico programa de actividades paralelas como concertos ou roteiros cinematográficas polo centro histórico da cidade e unha serie de actividades de formación que inclúen seminarios, charlas, obradoiros e clases maxistrais.

I Seminario de crítica cinematográfica en formato podcast

Organizado en colaboración coa revista dixital, A Cuarta Parede, Play-Doc acollerá un seminario dirixido a todos aqueles que desexen aprender sobre crítica cinematográfica. Nesta ocasión, o curso pretende explorar un dos formatos de comunicación máis consumidos actualmente, o podcast, que nos últimos tempos experimentou un auxe sen precedentes.

A actividade, que contará cunha parte teórica e outra práctica, terá lugar o 7 e 8 de maio, dentro do marco do festival, e está dirixida a todas aquelas persoas interesadas en aprender as nocións e ferramentas básicas para elaborar pezas sonoras de análises fílmico neste formato.

O seminario será impartido por Mariona Borrull, recoñecida crítica de cinema e televisión, e por Cibrán Tenreiro, profesor na Facultade de Ciencias da Comunicación e membro do Grupo de Estudos Audiovisuais na Universidade de Santiago de Compostela.

A matrícula abrirase o vindeiro martes 5 de abril ata o 3 de maio. As persoas interesadas deberán escribir un correo a Info@acuartaparede.com co asunto “Seminario PlayDoc”. O prezo da matrícula é de 25 euros. Todos os rexistrados contarán cunha acreditación gratuíta para asistir a todas as proxeccións do festival.

O Imaxinario da Fronteira: Obradoiro de cinema comunitario

Play-Doc propón un obradoiro audiovisual para reflexionar sobre o concepto de fronteira e convida a veciños e veciñas da comarca para realizar pequenas películas nas que reflexionen sobre a súa propia relación e experiencias coa fronteira, ben sexa como espazo físico, emocional ou metafórico.

Este obradoiro será impartido por Eloy Domínguez Serén, recentemente premiado coa Biznaga de Prata á mellor curtametraxe na pasada edición do Festival de Cinema de Málaga polo seu primeiro proxecto de ficción Rompente. A carreira de Domínguez conta cunha notable traxectoria internacional, na que destacan títulos como Hamada ou No cow on the ice.

Ao longo do mes de abril os e as participantes realizarán pequenas películas de curta duración. Durante todo o proceso contarán co seguimento e o asesoramento do cineasta Eloy Domíniguez Serén e as pezas audiovisuais resultantes presentaranse dentro do marco da celebración de Play-Doc.
A inscrición é gratuíta e estará aberta ata o 14 de abril. Todos aqueles que desexen participar deben enviar un correo co asunto ‘Taller Play-Doc’ a produccion@play-doc.com.