Poetas Di(n)versos trae por primeira vez a Galicia á Premio Cervantes Ida Vitale a carón de Manuel Rivas

Se esta programación poética leva desde 2009 reunindo no Centro Ágora, un luns de cada mes, unha das mellores voces da poesía mundial a carón doutra en lingua galega, a cita deste vindeiro 28 de marzo será de altura. Premios Pulitzer de poesía, candidatos ao Nobel, premios Cervantes e un senfín de Nacionais de poesía dos cinco continentes teñen pasado xa polas táboas do escenario do centro situado na Agra do Orzán, con entrada sempre aberta e gratuíta. Nesta ocasión, e no recital correspondente ao mes de marzo, as que se reúnan serán, pois, dúas das plumas máis importantes das literaturas escritas en español e galego: a uruguaia Ida Vitale e o coruñés Manuel Rivas. Tamén novelista Premio Nacional de Narrativa 1996, con obras adaptadas ao cinema e unha das maiores proxeccións internacionais da historia da literatura galega, Rivas é tamén un poeta que se iniciara da man do Premio de Poesía O Facho nos primeiros anos 80, e o último dos seus dez poemarios publicados viu a luz o pasado ano: O que fica fóra (2021). Este histórico recital poético será ás 20h e unha libraría de proximidade achegará exemplares dos convidados para aquelas persoas interesadas en levar neles unha sinatura.

O seguinte recital poético producirase só unha semana máis tarde, pois o luns 4 de abril o escenario do Centro Ágora acollerá a lectura poética dun dos máis puxantes poetas mozos de Europa do leste, o letón Arvis Viguls (1987) –que se encontra este mes na Coruña na Residencia Literaria 1863 da rúa Rego de Auga con motivo da Bolsa Xacobeo para Tradutores/as de Literatura Galega– a carón de Lorena Souto (O Páramo, Lugo, 1983), un dos nomes propios da poesía galega moza.

Así se definirán os dous próximos recitais poéticos dos meses de marzo e abril, seducindo a propios e estraños coa forza da palabra poética en galego, castelán e letón. POETAS DI(N)VERSOS segue a ser o único ciclo estable que presenta poetas internacionais de maneira regular (neste caso unha vez por mes) en toda España. A lingua de comunicación de todo este programa de vocación global é o galego e en 2014 recibira o Premio da Crítica de Galicia á Mellor Iniciativa Cultural.