Bota a andar na USC a XXVII Asemblea Xeral do Grupo Compostela de Universidades

Preto dun centenar de participantes procedentes de doce países (Polonia, México, Xeorxia, España, Suecia, República Checa, Eslovaquia, Perú, Italia, Portugal, Alemaña e Hungría) toman parte neste foro. O 60% farano de xeito presencial e o 40%, en liña.

“O fenómeno do Xacobeo adoita relacionarse cos valores humanísticos que dan lugar á construción de sociedades, complementados con outros valores xerados pola educación STEM”, explicou o reitor. “Nesta Asemblea Xeral queremos abordar a conciliación da educación tanto humanística como científico-técnica dende o punto de vista institucional nunha contorna de análise académica e tamén de celebración cultural no corazón de Galicia”, sinalou. Tras o acto oficial de apertura, ten lugar a reunión do Consello Xeral do GCU no Centro de Estudos Avanzados (CEA) da USC.

Javier Solana

Nesta primeira xornada do día 13 de setembro, ás 20.30 horas, no Paraninfo da USC (Facultade de Xeografía e Historia), desenvólvese a cerimonia de entrega do XXV Premio Internacional Grupo Compostela-Xunta de Galicia a Javier Solana de Madariaga pola “súa actuación en favor dos principais fitos da ruta xacobea”, entre os que sobresae a cerimonia organizada en 1987 con motivo da declaración do Camiño de Santiago como primeiro itinerario cultural europeo por parte do Consello de Europa. Ademais, os membros do xurado destacaron no ditame que se deu a coñecer en xullo o seu “permanente compromiso social” e a súa traxectoria internacional, ao longo da cal contribuíu ao “desenvolvemento dos valores europeos da cooperación, integración, diversidade, tolerancia e unidade que rodean” a ruta de peregrinación.

Diálogos Compostela

A xornada do 14 de setembro abrirase cos denominados ‘Diálogos Compostela en Educación Superior’. O reitor Antonio López estará acompañado na sesión de apertura polos ex reitores Darío Villanueva e Senén Barro que abordarán precisamente o vínculo entre formación humanística e científico-técnica, así como o reto que este nexo supón para a educación universitaria.

O acto dará comezo ás 10.00 horas no CEA da USC. Unha visita guiada no marco do Xacobeo 2021 servirá de colofón para esta Asemblea cuxo acto de clausura, tamén no CEA, dará comezo ás 13.30 horas do martes 14 de setembro.