O FIC Via XIV presenta unha nova edición con máis de 30 curtas dunha ducia de países

O director da Axencia Galega das Industrias Culturais (Agadic), Jacobo Sutil, participou nesta presentación xunto aos representantes da dirección do certame, do Concello de Verín e da Deputación Provincial de Ourense. Na súa intervención, incidiu no gran traballo que se está a levar a cabo tanto desde a iniciativa pública como desde a privada para manter as principais citas do calendario cultural galego, adaptando os seus formatos e datas co fin de garantir tanto a seguridade dos asistentes como a calidade das propostas.

Neste sentido, lembrou que o obxectivo do Plan de reactivación do sector cultural posto en marcha polo Goberno galego é darlle resposta a este esforzo cunha serie de medidas para contribuír á recuperación da actividade. “Entre elas, atópase o reforzo das subvencións aos festivais profesionais de cinema, unha liña de apoio que a Xunta mantén desde 2014 consciente do carácter estratéxico destes eventos como motores de dinamización cultural, ademais de económica e turística, nas súas localidades e comarcas”, engadiu.

Catorce encontros subvencionados

O representante da Consellería de Cultura, Educación e Universidade explicou que a través da convocatoria destas axudas este ano se contribúe á organización de 14 encontros cun investimento total de 200.000 euros. Subliñou tamén que esta dotación supón un incremento de máis do 5% respecto a 2020, consolidando a tendencia ascendente destas subvencións nos últimos anos.

As bases deste 2021 introduciron, ademais, unha serie de novidades nos criterios de valoración para ter en conta a aposta dos festivais por manter a súa celebración o ano pasado e valorando igualmente a proposta de accións específicas para o ámbito dixital.

É o caso do FIC de Verín, que por vez primeira exhibirá en liña as curtametraxes seleccionadas a través da plataforma Festhome. Xunto ao concurso nas súas categorías habituais (Horizontes, Outra Mirada, A Raia e Nova), tamén poderá verse unha selección procedente do Tempo Documentary Festival, un foro cinematográfico sueco que é o festival convidado nesta sexta edición.

Entre as actividades paralelas deste ano, destaca así mesmo a proxección para o público infantil da película Fantasía de Disney ou a preestrea en Galicia do documental Tierra de leche y miel, dirixido polo verinés Héctor Domínguez-Viguera xunto a Gonzalo Recio e Carlos Mora, e gañador da sección DOC na 65ª Seminci de Valladolid.