As reivindicacións da muller presentes en dúas novas exposicións no Museo Provincial de Lugo

A Deputada de Cultura, Pilar García Porto, avanzou, este xoves que xa están abertas dúas novas exposicións no Museo Provincial de Lugo. A Sala Multiusos acolle A muller do século XXI, que estará aberta ata o día 30 de maio, e o Refectorio mostra Bruxa! Libres, rebeldes, insubmisas, dispoñible ata o vindeiro 8 de xuño.

A muller no século XXI, organizada por Mans Unidas, mostra un percorrido polo traballo a favor do cumprimento dos dereito humanos, o mellor camiño para alcanzar a dignidade e a igualdade entre todos. Dende esta organización, denuncian que a pobreza ten rostro de muller, polo que promoven proxectos de desenvolvemento especialmente centrado na figura femenina, protagonista esencial no seu traballo en educación para o desenvolvemento e nos seus proxectos de cooperación en arredor de 60 países.

Bruxa! Libres, rebeldes, insubmisas, de Viki Rivadulla, é un proxecto artístico sobre a violencia contra as mulleres e que reivindica a súa liberdade. A exposición mostra figura da bruxa coma muller empoderada. Esta figura da muller é unha peza fundamental para os cambios sociais e políticos necesarios na nosa sociedade. A exposición fala tamén da autoconciencia, a autoformación , deconstrución e a sororidade como ferramentas de loita.

As exposicións son de balde e os horarios: de luns a venres: de 9:00 a 21:00 horas, sábados: 10:30 a 14:00 horas e de 16:30 a 20:00 horas e os domingos e festivos: 11:00 a 14:00 horas.