A catedrática de Comunicación Audiovisual da USC, Margarita Ledo, recibe o premio Otero Pedrayo 2017

Coincidindo co 130º aniversario do nacemento de Ramón Otero Pedrayo, a Deputación Provincial de Pontevedra celebrou no Sexto Edificio do Museo o acto de entrega do premio que leva o nome deste escritor á académica, escritora e catedrática de Comunicación Audiovisual da USC, Margarita Ledo Andión.

Margarita Ledo é a primeira muller á que se entrega o Premio Otero Pedrayo nos 40 anos de historia do galardón. Convocado anualmente desde 1977 pola Xunta e o catro deputacións provinciais para recoñecer a traxectoria de personalidades que contribuísen a fomentar a cultura galega. A súa candidatura fora proposta pola Deputación de Pontevedra, á que este ano lle tocou convocar este galardón, dotado con 16.000 euros. O premio á académica lucense foi outorgado por unanimidade do xurado.

O fallo recoñece a traxectoria vital, profesional e intelectual de Margarita Ledo, marcada pola súa temperá militancia política, o exilio e o lectorado de galego na facultade de Letras da Universidade do Porto, o xornalismo comprometido e as primeiras investigacións sobre as relacións dos intelectuais republicanos galegos e portugueses. O xurado destacou ademais o seu papel como "pioneira" no uso de xéneros audiovisuais inéditos en Galicia, a perspectiva de xénero empregada en todos os seus traballos e investigacións ou a defensa do idioma galego e a identidade propia de Galicia.

Margarita Ledo Andión naceu en Castro de Rei (Lugo) en 1951 e é escritora, cineasta, doutora en Ciencias da Información pola Universitat Autònoma de Barcelona e catedrática de Comunicación Audiovisual da Universidade de Santiago de Compostela. É membro da Real Academia Galega desde 2009, converténdose na quinta muller presente nesta institución, ocupando a cadeira que entre 1929 e 1976 tiña o escritor Ramón Otero Pedrayo.

O acto estivo presidido pola presidenta provincial, Carmela Silva, e contou coa participación do secretario xeral de Política Lingüística, Valentín García, e da académica e escritora, Fina Casalderrey, que foi a encargada de glosar a figura da autora gañadora. As intervencións musicais correron a cargo do dúo feminino Xonxas.