O xornalista Xulio Xiz recibe a Medalla de Ouro de Vilalba pola súa traxectoria

A corporación municipal de Vilalba decidiu por unanimidade concederlle a Medalla de Ouro da vila ao xornalista chairego Xulio Xiz, que recibiu esta distinción nun acto público celebrado o venres 29 de decembro no auditorio Carmen Estévez da capital da Terra Chá.

O evento contou coa participación de numerosas persoalidades da vida cultural de Vilalba, así como de agrupacións musicais como a Coral Polifónica de Vilalba, a Banda de Música de Vilalba e o Orfeón Lucense. Este acto implicou un sentido recoñecemento público aos anos de adicación de Xulio Xiz considerado un gran dinamizador da cultura na súa vila natal. A entrega da Medalla de Ouro do Concello de Vilalba a este xornalista valora toda unha vida adicada a colaborar e organizar miles de actos e homenaxes, presentador e mantedor de diversos eventos, e membro do xurado do Certame Literario do Excmo. Concello de Vilalba desde a súa orixe.

Coa emoción desta distinción, que recibiu de mans do alcalde Agustín Baamonde, o xornalista Xulio Xiz agradeceu o galardón e, ademáis de reivindicar a súa amizade con Vilalba, manifestou o seu compromiso con este pobo "que tanto me deu". As súas palabras xiraron en torno a "unha declaración de amor" cara esta vila que o viu nacer e da que agora recibe a súa gratitude a xeito deste recoñecemento.

O acto rematou coa interpretación da canción "O carro" nunha colaboración especial da Coral Polifónica de Vilalba, a Banda de Música de Vilalba e o Orfeón Lucense.

Fotografías: Carlos Rodríguez Arias.