Chus Pato gaña o Premio Mondoñedo 10 co libro de poesía Hordas de escritura

O xurado recoñece a importancia dunha obra "con vocación experimental" na que a poeta "intenta artellar un discurso de colectividade na liña da poesía moderna escapando do suxeito lírico individual". Salienta tamén o xurado a vontade de Hordas de escritura de "superar os límites da linguaxe poética convencional, transgredindo os xénero literarios" e considera este título "un paso adiante no proxecto de indagación das posibilidades da linguaxe poética que a autora desenvolve".

O Premio Mondoñedo 10 foi creado en 2016 para recoñecer cada ano, en ciclos de dez, o mellor traballo nunha modalidade creativa. Na primeira edición, dedicada á narrativa, a obra gañadora foi Os libros arden mal do tamén académico Manuel Rivas. Nesta ocasión foi a quenda da modalidade de poesía, na que Chus Pato tamén foi finalista con outro título, Carne de Leviatán (Galaxia 2013).

Os membros do xurado seleccionaron outros once títulos finalistas: Atravesar o fantasma de Carlos Callón (Xerais, 2014), Celebración (Apiario, 2014) de Gonzalo Hermo, Cráter (Toxosoutos, 2011) de Olga Novo, Duración da penumbra (Centro PEN Galicia, Xunta de Galicia, Afundación, 2016) de Miguel Anxo Fernán Vello, Estirpe de sombras (Editorial Barbantesa, 2014) de Raida Rodríguez Mosquera, Estúrdiga materia (Galaxia, 2008) de Luís González Tosar, Eu violei o lobo feroz (Através Editora, 2013) de Teresa Moure, Leopardo son (Espiral Maior, 2011) de Pilar Pallarés, Os ángulos da brasa (Kalandraka, 2011) de Manuel Álvarez Torneiro, Profundidade de campo (Espiral Maior, 2007) de Yolanda Castaño e Sextinario: trinta e seis +tres (Sotelo Blanco, 2007) de Marica Campo.