A Banda de Gaitas de Cántigas e Frores, de Lugo, representará a Galicia no Festival Interceltique Lorient 2016

Neste festival Galicia estará representada por unha delegación conformada por 150 persoas: grupos como A Vagabán (tamén lugués); Riobó; Vaamonde, Lamas & Romero; Brincadeira (Santiago de Compostela); Banda de Gaitas Malante (Malpica) acompañarán á Banda de Gaitas de Cántigas e Frores amosando a nosa cultura en diferentes espazos da cidade de Lorient.

O Festival Interceltique Lorient celébrase dende o ano 1971 na localidade francesa do mesmo nome. Terán representación, a maiores de Galicia (Galiza): Irlanda (Eire), Escocia (Alba), Bretaña (Breizh), Gales (Cymru), Illa de Man (Mannin), Cornualles (Kernow) e Asturias (Asturies). Dende o ano 2000, ano do mundo celta, engadíronse representacións de paises con emigración das nacións celtas como EEUU, Australia, Nova Zelandia, Arxentina e México.

A Banda de Gaitas de Cántigas e Frores actuará nas Nuit Interceltique dos días 6, 7, 9, 10 e 11 de agosto no Moustoir Stadium (estadio de fútbol do equipo de fútbol Lorient); na Grande Parade o 7 de agosto; e no Espace Marine dentro do acto de Musiques et danses du monde celte. Por outra banda, o grupo lugués A Vagabán formado por Bruno Villamor e Paula Fernández actuarán na Eglise Saint-Louis no ciclo de Musiques Sacrées, no que compartirán escenario con grupos de Cornualles. Esta non é a primeira vez que Cántigas e Frores participa neste festival, xa que no ano 1990, acompañados da extinta Banda de Gaitas da Deputación Provincial de Lugo, representaron a Galicia, no que é considerado o maior festival de música tradicional do mundo.