XXIII CONCURSO DE MÚSICA TRADICIONAL XACARANDAINA
O XXIII Concurso de Música Tradicional Xacarandaina terá lugar o día 27 de maio no Auditorio do Centro Ágora da Coruña, en sesión de mañá ás 11:00 h. e en sesión de tarde ás 17:00 h.
Este concurso consta de tres modalidades diferentes: pandeireta, cuartetos de gaita e gaiteiro solista. Esta última modalidade incorporouse o ano pasado como novidade , aínda que cando se creou o Concurso, hai xa 23 anos, era a única modalidade instrumental. A división das categorías realízase do mesmo xeito que no concurso de baile, aínda que varían segundo as modalidades: no apartado de pandereteiras cóntase con catro categorías, no de cuartetos de gaita cóntase con dúas categorías, e no apartado de gaiteiro solista existirá unha única categoría. No concurso poden participar grupos de Asociacións folclóricas, Centros Parroquiais, Asociacións Culturais e Recreativas e Asociacións Xuvenís etc. procedentes de toda Galicia. Todos os grupos participantes deberán cumprir as bases do concurso, onde se indica que é obrigatorio o uso de traxe tradicional. Concederanse tres premios por categoría, que se determinará pola media das idades dos compoñentes do grupo e ningún deles superará a media da categoría en máis de dous anos.
Cada grupo terá un tempo límite de 5 minutos, quedando descualificado o grupo que exceda dito tempo. O xurado no momento da cualificación terá en conta: autenticidade e dificultade da peza, afinación e interpretación e expresividade na interpretación.
En cada unha das categorías serán concedidos tres premios:
1º PREMIO: trofeo e 250 €
2º PREMIO: trofeo e 150 €
3º PREMIO: trofeo
O xurado estará composto por persoas de recoñecido prestixio do mundo do folclore, e serán alleos á Asociación Cultural Xacarandaina.
De resultar do seu interese a posibilidade de contactar coa Asociación Cultural Xacarandaina, achegámoslle, o teléfono móbil da Asociación: 687 882 824
Agradecéndolle novamente a atención prestada e o interese mostrado polos proxectos da Asociación Cultural Xacarandaina, reciban un atento e afectuoso saúdo.
Asdo.: René Gómez Martínez
Presidente da Asociación Cultural Xacarandaina
