Corral, Victor
General
Victor Corral naceu en Baamonde (Lugo) o 14 de setembro de 1937, no seo dunha familia moi arraigada naquela terra.
Os seus primeiros estudos fíxoos na escola do seu pobo e as súas primeiras tallas naceron a carón da natureza observando a fauna e a flora da súa bisbarra.
Desplazado á Coruña, polas súas obrigas militares, escomenza o ensino artístico reglado na súa Escola de Artes e Oficios Artísticos na que tivo como mestre ó profesor José Juan, que había de influir moito na súa formación.
Desprazado a Cataluña, traballa no obradoiro de Andreu no que aprendeu a tallar pezas de sabor románico e gótico, e na Escola de Artes e Oficios Artísticos de Barcelona, mellora a súa formación cos profesores Montagut e Vélez. No ano 1964 traballa no obradoiro do mallorquín Martinet onde labrou moitas obras en pedra e en madeira.
En 1967, na procura de novos horizontes, emigra a Suiza, e en Xenebra expón unha trintena de obras.
Xa de novo na súa terra comenza a contrucción da súa Casa-museo e a partir de entón, adicouse por enteiro o seu labor artístico, amosando a súa obra en numerosas exposicións individuais e colectivas.
A obra escultórica de Victor Corral é moi numerosa; forman parte dela máis dun milleiro de pezas singulares. Esta cantidade de obras, foron esculpidas en moi diversos materiais e en estilos diferentes e variados, e a través delas expuso o seu imaxinario mundo vital e estético con singular acerto.
É de destacar a orixinalidade do emprego de árbores vivas para labrar nelas temas relixiosos, como é o caso da Virxe do Rosario nun castiñeiro perto da igrexa parroquial do seu pobo.
O granito da comarca serviulle para tallar esculturas que hoxe se atopan no xardín da súa Casa-museo e en outros lugares públicos.
Tamén o mármore de Carrara ou o marfil son utilizados por Víctor Corral para facer as súas obras, e moitas delas, esculpidas orixinalmente en madeira, foron fundidas en bronce ou cocidas en porcelana.
Moitos foron os críticos que se preocuparon da obra de Corral, e entre eles, vale a pena mencionar a Trapero Pardo, Castro Couso, Ester Ollo i Comas, Malú Sánchez, etc..., confluindo todos eles en determinar o estilo propio e xenuino do escultor, á marxe das vangardas e das tendencias artísticas. Aínda así, na obra de Corral pódense percibir ecos do románico e do gótico, influencias do manierismo de Miguel Anxo, trazos do impresionaismo de Rodin, e do expresionismo, e por riba de todo o tipismo galego o estilo de Asorey, presente en tódala súa obra.
