Crítica

'O elefante dunha soa orella' de X.H. Rivadulla Corcón.
Ilustrador: Juan Sanmiguel. Santiago: Sotelo Blanco, 2004.

Conto de Xosé Henrique Rivadulla Corcón (A Coruña, 1962) no que se presenta a un elefantiño de peluche que en primeira persoa narra cómo o fixeron en Beade nun taller de artesáns xogueteiros cunha soa orella, defecto polo que permaneceu algún tempo só no escuro almacén dunha xoguetería da Coruña. Este narrador, que en ocasións se dirixe ao lectorado, cede a voz a un grupo de amigos para dar a coñecer a historia da súa vida até que chegou a mans de Dulce, unha nena orfa de nai que vive soa co pai. Os personaxes que conforman o seu contorno máis inmediato como o peixe de goma Pipo, a flor de metal, o reloxo Time, a Lámpada do Almacén, o Xenio de Aladino, os zapatos de pai, o Delfín, etc. van contando as accións que levan a cabo cada un deles para conseguir facer a Dulce feliz e as peripecias que viven para que ela consiga o seu obxectivo de ter como agasallo un elefante de peluche. As ilustracións de Juan Sanmiguel están realizadas con debuxos en branco e negro. O seu estilo é figurativo e o tratamento das figuras é clásico no deseño das formas e no emprego do claroscuro a través de tonalidades suaves e difuminadas de grises.