Crítica

Só pode ocorrer en Galicia

Só pode ocorrer en Galicia,
que no máis escuro da noite,
unha estrela dourada serva
de axuda ó perdido camiñante,
nunha festa incesante de luz e cor.

Só pode ocorrer en Galicia,
que as follas,
froito da luxuria desmedida entre a terra e as augas,
sexan secuestradas polo inexorable tempo,
que muda a beleza do seu rostro
e as converte en materia inerte,
mentres que o inverno zuga
os seus derradeiros suspiros.

Só pode ocorrer en Galicia,
que os ríos,
como os más valentes soldados,
loiten sen contemplacións
contra as montañas,
formando serpes de caprichosas formas
que o entorno abraza.

Só pode ocorrer en Galicia,
que a escuma do mar
emita sen descanso
un asubío sensual e hipnotizador,
coma doces aloumiños
para as rochas.

Certamente,
só pode ocorrer en Galicia,
que non sexan as musas
as que inspiren ó artista,
senón o fluxo místico e esotérico
que a envolve,
e que coverte o kafkiano en factible
o inalcanzable en próximo
e o banal en ARTE.

Jesús Rey Modia

Na temática da súa obra plasma especialmente os valores tradicionais e culturais de Galicia; as súas xentes do mar, do campo... as súas inigualables paisaxes, así como retratos e alegorías de persoeiros de gran relevancia da nosa literatura; Rosalía, Castelao, Fole, Trapero Pardo, Nicomedes Pastor Díaz... Sinte especial predilección pola composición de bodegóns costumistas das nosas tradicións.